Лем вам сміх у голові. Найсмішніші анекдоти тижня
Малий Мигалько позерат, як нянько малює плафон у комнаті. Мамка му каже:
– Позерай і вчися, синку. Як уростеш великий, будеш нянькови помагати.
– Йой, мамко, ти што. Май розум! Ун што до того часу ще все не домалює?
***
Маріка з Іванком недавно ся поженили, лягли вночи спати.
Раз лиш Іванко звідат:
– Любима, ти спиш?
– Нєт.
– Дуже добре, товди ся оберни до мене.
– Не хочу, ти цибулю їв.
– А ти пасулю!
***
Попав Порошенко у рай. Встрічає його апостол Петро й каже:
«Радийим вам видіти, пане Президенте! Заходьте у рай. Айбо перед тим, як вас там поселити, мушу вам одну вещ уповісти, тоесть одну проблему з вами треба рішити. Розумієте, діло в тому, што ото велика рідкость, оби політик, што при жізні робив на такуй високуй должності у рай попав. І, чесно кажучи, я не знаю што з вами чинити. Тому ми ся туй із другими апостолами порадили і рішилисьме вам предложити один такий варіант: ви один динь проведете у пеклі, а один у раю. Дале си сядете, подумаєте і рішите, де вічность хочете проводити»
«Добре», – каже Порошенко.
Пров’юг го Петро до ліфра і спустив у пекло. Уйшов Порошенко і видит: чудеса! Ще май файно кругом, ги на його дачі пуд Києвом. Рядом величезное ярко-зеленоє поле для гольфу. Мало май далеко – шикарний ресторан. До нього нараз прибугли усі його цімбори-політики: і Яценюк, і Юлька, і Ляшко, і Парубій, і ще й наші Балоги. Они ся радісно пообнімали, потискали си руки, начали вспоминати старі добрі часи, кой они у власті були, коли гроші самі ріков до них текли. Дальше си пушли зіграли партію у гольф, повечеряли в ресторані чорнов ікров, рошеновським тортом і запили всьо закарпатським коньяком.
З ними вечеряв і сам Сатана, який ся даже полюбив Порошенкови, показавмуся порядним челядником, культурним, веселим і дуже розговорчивим. Порошенко так дуже файно пров’юг час, даже не замітив, як сутка пролетіла. Опомнився лиш товди, коли за ним прийшов апостол Петро. Порпрощався ун із цімборами, зайшов у ліфт і піднялися они у рай.
Уйшов у раю, а там – річка і зелений ліс. Цілий динь прийшлося му на арфі грати, пісні співати і молитися. Так му сумно стало, што мало не разевався. Час му ся тяг довго, ги черепаха.
Накониць прийшов Петро і звідат го:
«Но што, пане Президенте, динь провелисьте в пеклі, динь у раю. Вибирайте, де хочете ся устати»
Порошенко подумав і каже:
«Ну, що я можу сказати, рай – це, звичайно, дуже гарне місце, але здається, мені більше сподобалося в пеклі».
Апостол Петро, знизав плечима, айбо што чинити. Вибор його. Пров’юг го до ліфта і пушов си по ділах.
Уйшов Порошенко в пеклі , а там – величезна пустиня уся завалена сміттьом, усі його цімбори-депутати одіті у роби і гнуй грузять на торбонци з лопатами. Порошенкови аж челюсть удвисла. Раз лем позерат, а до нього Сатана йде, руку му простігає, оби ся поздоровати.
« Я не розумію, – каже му перепужений Порошенко. – Вчора тут було поле для гольфу і ресторан, де у нас була вечеря з чорною ікрою і тортом, і взагалі, ми так чудово відтягнулися… А зараз тут тільки ця пустеля, завалена сміттям, а мої друзі здаються останніми невдахами»
Сатана попозерався на нього і лиш ся засміяв хитро:
«Не мерегуйся, друже. Учора у нас була передвиборча кампанія. А нині ти за нас вже проголосував».
